Orgullo no reino animal

O 28 de xuño é o Día Internacional do Orgullo LGTB e, como cada ano, dende as Bibliotecas Municipais da Coruña organizamos toda unha programación arredor desta temática para contribuír a dar maior visibilidade e apoiar á comunidade LGTB na súa loita polo respecto.

Cartel da campaña LGTB 2014 «As Municipais Entenden». Podedes seguir a campaña en redes sociais e participar co hastagh #LeConOrgullo

E dende o blog do Club de Ciencia e Investigación non se nos ocorre mellor tema para reivindicar a diversidade na natureza que o orgullo no reino animal.

E foi o biólogo, lingüista e escritor canadense Bruce Bagemihl o primeiro en realizar unha exhaustiva análise da homosexualidade animal na súa obra Biological Exuberance: Animal Homosexuality and Natural Diversity, publicada no ano 1999.

No seu libro, Bagemihl documenta científicamente a homosexualidade en mais de 450 especies de mamíferos, aves, réptiles, insectos e outros moitos animais de todo o mundo. E afirma que o comportamento homosexual e bisexual entre animais é normal e habitual na natureza.

Con abundantes ilustracións, datos fascinantes e descricións asombrosas da conduta animal, Biological Exhuberance é un referente que cambiará para sempre o modo en que observamos a natureza.

E precisamente, a primeira exposición internacional que aborda o tema da homosexualidade nos animais toma como base, entre outros, o traballo de Bagemihl. Trátase de Against Nature?: an exhibition on animal homosexuality, organizada polo Museo de Historia Natural da Universidade de Oslo (Noruega).

Activa dende o mes de outubro de 2006 ata agosto de 2007, a exposición amosa -a través de fotografías e textos- unha pequena selección das mais de 1.500 especies nas que se observou comportamentos homosexuais. O Museo de Historia Natural de Oslo buscou con esta exposición axudar a desmitificar a homosexualidade humana e rexeitar o argumento -por desgraza estendido nalgúns sectores- de que a homosexualidade é un crime contra natura.

Algunhas das imaxes que ilustraron a exposición Against Nature?:

Dúas baleas femia, dúas xirafas macho e dous bonobos femia.

En ocasións penso que moito temos que aprender todavía da natureza. A fin de contas…

Non latexan os corazóns de todas as persoas do mesmo xeito?

Non experimentamos todos os seres humanos as mesmas emocións?

Non somos todos igual de semellantes e igual de diferentes a un tempo?

#Recomendamosbmc consultar a wiki temática As Municipais Entenden e a guía de lectura #LeConOrgullo 2014